დირექტორი გვამცნობს...
დასრულდა კიდევ ერთი სასწავლო წელი. ეს წელი, კოვიდ პანდემიის ფონზე, რთული, გამოწვევებით სავსე, უმეტესად დისტანციური სწავლების წელი აღმოჩნდა. საკლასო ოთახებში მხოლოდ 9 მარტს დავბრუნდით. BGS-ში ჰიბრიდული სწავლება დაინერგა. კვლავ გაუქმდა ბრიტანული საერთაშორისო გამოცდები და მოსწავლეთა შეფასება, 3 წერითი მტკიცებულების საფუძველზე, მასწავლებლებს მოუწიათ. ეს იყო მეტად შრომატევადი, სრულიად ახალი გამოწვევა BGS-ის საგამოცდო ცენტრისათვის.
დიდ მადლობა ჩვენს არაჩვეულებრივ, მცოდნე, კეთილგანწყობილ, სამართლიან, პროფესიონალ მასწავლებლებს და შრომისმოყვარე, პასუხისმგებლიან, მოტივირებულ მოსწავლეებს. მადლობა მშობლებს თანადგომისთვის.
BGS-მა კიდევ ერთხელ დაამტკიცა, რომ შემოქმედებითი, განვითარებაზე ორიენტირებული, სირთულეების დამძლევი გუნდია.
ბედნიერ დასვენებას გისურვებთ ! ! !
დირექტორი გვამცნობს...
გილოცავთ აღდგომის ბრწყინვალე დღესასწაულს !!
აპრილმა - თბილი და მზიანი ამინდებით - საშუალება მოგვცა დიდი დრო მოსწავლეებმა სუფთა ჰაერზე გაატარონ, რაც ასე მნიშვნელოვანია პანდემიის დროს. აპრილისათვის სპეციალური ცხრილი შევადგინეთ, რომლის მიხედვით ყველა კლასი ეზოში არა მხოლოდ თამაშობს, არამედ გარკვეულ აქტივობებშია ჩართული. ჩვენს წინ მდებარე საბავშვო ბაღმა დაგვითმო კეთილმოწყობილი გასართობი ღია სივრცე, რომელსაც ვიყენებთ ჩვენს ეზოსთან ერთად. ამიტომ ეზოში მთელი დღე დიდი ჟრიამულია.
აპრილში BGS-ში რამდენიმე საინტერესო პროექტი განხორციელდა, უფორმო დღეც გვქონდა, სტუმარიც მოვიწვიეთ . . . განაგრძეთ კითხვა და ყველა ამ ღონისძიების შესახებ დაწვრილებით შეიტყობთ თვის სიახლეებიდან.
28 აპრილიდან BGS-ში სააღდგომო არდადეგები იწყება.
დირექტორი გვამცნობს . . .
საგაზაფხულო არდადეგების შემდეგ, 9 მარტს, BGS-ში სასწავლო პროცესი საკლასო ოთახებში განახლდა.
არც ერთ BGS-ელს არ დაავიწყდება ეს დღე - პირბადეებით და სახის დამცავი ფარებით აღჭურვილი ადმინისტრაცია და მასწავლებლები, სკოლის სამივე შესასვლელთან თერმოსკრინინგი და დეზობარიერები . . . მაგრამ მთავარი საოცარი ემოცია იყო - ჩვენი ერთი წლის უნახავი მოსწავლეების დაბრუნება სკოლაში, ბავშვების სიხარულით აღსავსე თვალები, სკოლის და ერთმანეთის მონატრების გამომხატველი ჟესტები ოღონდ 1 მეტრიან დისტანციაზე . . .
იმედი გვაქვს საკლასო სწავლების რეჟიმში დავრჩებით სასწავლო წლის ბოლომდე . . .
დირექტორი გვამცნობს . . .
BGS-ში სასწავლო პროცესი, ზამთრის არდადეგების შემდეგ, 11 იანვარს განახლდა, მაგრამ კვლავ დისტანციური სწავლების მოდელით.
საქართველოს განათლების და მეცნიერების სამინისტროს გადაწყვეტილებით, 15 თებერვლიდან თბილისის სკოლებში საკლასო სწავლების პროცესი განახლდა. ჩვენმა სკოლამ თხოვნით მიმართა სამინისტროს 2 კვირით ონლაინ რეჟიმზე დარჩენის თაობაზე და ნებართვა მოიპოვა. ეს გადაწყვეტილება მივიღეთ ჩვენი სკოლის მოსწავლეებისა და თანამშრომლების უსაფრთხოებისა და ჯანმრთელობისათვის. ვიფიქრეთ, უკეთესი იქნებოდა დავკვირვებოდით კორონა ვირუსის გავრცელების დინამიკას.
27 თებერვლიდან 9 მარტამდე სკოლაში ცხადდება საგაზაფხულო არდადეგები. 9 მარტს BGS-ში განახლდება სასწავლო პროცესი საკლასო ოთახებში. ველით ჩვენს მონატრებულ მოსწავლეებს, არასტაბილური ეპიდვითარების გამო ჩატარებული ინფრასტრუქტურული ცვლილებებით.
დირექტორი გვამცნობს . . .
ძვირფასო BGS-ელებო - მოსწავლეებო, მშობლებო, თანამშრომლებო - გულითადად გილოცავთ ახალ წელს და შობის ბრწყინვალე დღესასწაულს!!
დეკემბერი - სემესტრის დასასრული, როგორც ყოველთვის დატვირთული შემაჯამებელი შეფასებებითა თუ პრეზენტაციებით, ამავდროულად საინტერესო და სახალისო ღონისძიებების ნაკრებია. წლევანდელი პანდემიის ფონზე, დისტანციური სწავლების რეჟიმის მიუხედავად, შევეცადეთ ტრადიცია არ დაგვერღვია და საახალწლო განწყობა შეგვენარჩუნებინა: მოსწავლეებთან და მასწავლებლებთან რამდენიმე საინტერესო სტუმარი მოვიწვიეთ, ყველა კლასმა პროექტი წარმოადგინა, დაწყებითი კლასების მოსწავლეებმა ზუმში მშობლებიც მოიწვიეს და სასწავლო წლის ბოლო ორი დღე ყველამ ერთად ვიხალისეთ.
BGS-ში 11 იანვრამდე ზამთრის არდადეგები გამოცხადდა!
4 ნოემბრიდან 25 ნოემბრამდე სასწავლო პროცესი დისტანციურ რეჟიმში გადადის
“სასწავლო პროცესის განახლების გრაფიკი იცვლება და 4 ნოემბრიდან 25-ნოემბრამდე ისეთ დიდ ქალაქებში, როგორიც არის თბილისი, ქუთაისი, რუსთავი, თელავი, ზუგდიდი, ზესტაფონი, გორი, ფოთი, მარნეული და გარდაბანი, პირველიდან მეთორმეტე კლასის ჩათვლით, სასწავლო პროცესი გადავა სრულად დისტანციურ ფორმატზე, სასწავლო პროცესი ასევე დისტანციურად მიმდინარეობს აჭარის რეგიონში.” – განაცხადა განათლების მინისტრის მოადგილე ეკატერინე დგებუაძემ საკოორდინაციო საბჭოს სხდომის დასრულების შემდეგ.
გადაწყვეტილება გახანგრძლივებული საარჩევნო პროცესისა და დიდ ქალაქებში მობილობის შემცირების მიზნით იქნა მიღებული. კერძოდ, 21 ნოემბერს ჩატარდება არჩევნების მეორე ტური, საარჩევნო უბნებად კი ასეულობით სკოლა კვლავ იქნება გამოყენებული. “ერთი საკითხი იყო სკოლები სადაც საარჩევნო უბნები იყო განთავსებული და მეორე დიდ ქალაქებში მობილობის პრევენცია. ეს გადაწყვეტილება ხელს შეუწყობს არ გამწვავდეს მეტად ამ ქალაქებში ეპიდსიტუაცია. ეს ქალაქები სრულად გადავა დისტანციურ სწავლებაზე, როგორც საჯარო, ისე კერძო სკოლები“,- განაცხადა დგებუაძემ.
რაც შეეხება უმაღლეს სასწავლო დაწესებულებებსა და პროფესიულ სასწავლებლებს, ისინი სასწავლო პროცესს ისევე განაგრძობენ, როგორც აქამდე. კერძოდ, უნივერსიტეტები პრაქტიკულ და ლაბორატორიულ მეცადინეობებს წარმართავენ არადისტანციურ რეჟიმში ჯანდაცვის სამინისტროს რეკომენდაციების ზედმიწევნით დაცვით.
აჭარის ავტონომიური რესპუბლიკის ტერიტორიაზე მოქმედი უმაღლესი საგანმანათლებლო დაწესებულებები სასწავლო პროცესს აგრძელებენ დისტანციურ რეჟიმში.
დირექტორი გვამცნობს...
მთელი საგანმანათლებლო მსოფლიო, ასევე ჩვენი სკოლა კოვიდ 19-თან შეგუების პირობებში ცხოვრობს . . .
საკლასო რეჟიმში სწავლა 15 სექტემბერს უნდა დაწყებულიყო, მაგრამ ეპიდემიოლოგიური ვითარების გაუარესების გამო, განათლების მინისტრის ბრძანებით, 1 ოქტომბრამდე დისტანციური სწავლების ფორმით გადავადდა.
1 ოქტომბერსაც მხოლოდ I-VI კლასების მოსწავლეებს მიეცათ სკოლებში გამოცხადების უფლება, VII-XII კლასებისთვის კი დისტანციური სწავლება გაგრძელდა 29 დეკემბრამდე.
არც ერთ BGS-ელს არ დაავიწყდება 1 ოქტომბერი - პირბადეებით და სახის დამცავი ფარებით აღჭურვილი ადმინისტრაცია და მასწავლებლები, სკოლის სამივე შესასვლელთან თერმოსკრინინგი და დეზობარიერები . . . მაგრამ მთავარი საოცარი ემოცია იყო - ჩვენი 6 თვის უნახავი მოსწავლეების დაბრუნება სკოლაში, ბავშვების სიხარულით აღსავსე თვალები, სკოლის და ერთმანეთის მონატრების გამომხატველი ჟესტები ოღონდ 1 მეტრიან დისტანციაზე . . .
საქართველოში კოვიდით დაავადებულთა რიცხვის სწრაფი და მკვეთრი ზრდის გამო, სკოლამ კვლავ სრულად დისტანციურ სწავლებაზე დროებით გადასვლის გადაწყვეტილება მიიღო (19 ოქტომბრიდან 30 ოქტომბრის ჩათვლით).
იმედი გვაქვს მსოფლიო მალე გადალახავს ამ რთულ გამოწვევას და ჩვენი ყველა მოსწავლე BGS-ის საკლასო ოთახებს დაუბრუნდება . .
დირექტორი გვამცნობს...
დისტანციურ სწავლებაზე გადასვლა სერიოზული გამოწვევა იყო მსოფლიო საგანმანათლებლო სისტემისათვის, ისევე როგორც ჩვენი სკოლისათვის.
მე, როგორც ამ სკოლის ხელმძღვანელი, თითქმის დარწმუნებული ვიყავი, რომ ჩვენი პედაგოგების კვალიფიკაციისა და პოტენციალის წყალობით აკადემიურადაც და ტექნიკურადაც დავძლევდით ამ გამოწვევას - ონლაინ სწავლებაზე უცაბედად გადასვლას.
ყველაზე მეტად რაზეც ვღელავდით იყო ის, რომ ჩვენი ბავშვები ნაკლებად სტრესულ სიტუაციაში აღმოჩენილიყვნენ.
ჩვენი მუშაობა სწორედ იმ მიმართულებით წავიდა, რომ მოსწავლეებს სკოლაში ყოფნის მაქსიმალური განცდა ჰქონოდათ.
ამისათვის შემოვიღეთ მოსწავლეთა ქცევის ახალი წესები (ფსიქოლოგების რჩევით), ძირითადი საგნების გარდა ვატარებდით ჭადრაკის, სპორტის, გამოყენებითი ხელოვნების გაკვეთილებს, გვქონდა ფსიქოლოგის საათი, სხვადასხვა ონლაინ რესურსებით ვცდილობდით, გაკვეთილები ისეთივე მრავალკომპონენტიანი და აქტივობებით დატვირთული ყოფილიყო, როგორც სკოლაში; ჩავატარეთ 6 მაისის დღესასწაული, პირველი და მეხუთე კლასების საფეხურის ცვლილების ცერემონიალი, ვითამაშეთ ინტელექტუალური თამაშის "რა, სად, როდის" ფინალი.
ვფიქრობთ, BGS-მა კიდევ ერთხელ დაამტკიცა, რომ შემოქმედებითი, განვითარებაზე ორიენტირებული, სირთულეების შეძლებისდაგვარად დამძლევი გუნდია.
მიუხედავად იმისა, რომ ვთვლით, BGS-მა სრულფასოვნად გაიარა ონლაინ სწავლების 3 თვიანი პერიოდი, არაფერი შეგვიცვლის ცოცხალ ურთიერთობას მოსწავლეებთან, სულ სხვაა უშუალო კონტაქტი მასწავლებელსა და მოსწავლეს შორის.
ამიტომ ყველანი მოუთმენლად ველით სექტემბერში სკოლაში დაბრუნებას, რათა ჩვეულ რეჟიმში განვაგრძოთ სასკოლო ცხოვრება BGS-ში.
BGS-ი "იმედის დღის" ეთერში
6 მაისი უფროსკლასელთათვის
მოსწავლეები შეხვდნენ დამრიგებლებს, რომლებსაც მომზადებული ჰქონდათ საინტერესო პრეზენტაციები.
VI და VII კლასელები დაესწრნენ ქალბატონი ნინო ციციშვილის მასტერკლასს.
გაიმართა ინტელექტუალური თამაშის “რა? სად? როდის?” ფინალური შეხვედრა, რომელშიც მონაწილეობდა ოთხი გუნდი.
თამაში მიმდინარეობდა ყოველგვარი წესების დაცვით, გუნდები ცალ-ცალკე ოთახებში იყვნენ გადანაწილებულნი, მოსწავლეები, წამყვანები შესაფერისად იყვნენ შემოსილნი, გულშემატკივართა შორის იყვნენ ჩვენი მეგობრები - წმინდა ნინოს სახელობის ნინოწმინდის ბავშვთა პანსიონის აღსაზრდელები.
გაიმარჯვეს მეთერტმეტე კლასის მოსწავლეებმა.
ვულოცავთ მათ გამარჯვებას.